13 Tonne Banane Songtext
von Schtärneföifi

Uii, es gseht nach emne Unfall us
En Laschtwage isch bim Rank gradus
Und voll i d′Leitplanke inekracht
Zum Glück hät's niemertem öppis gmacht

De Chauffeur schtaht bleich näbetdra
Und d′Polizei isch au scho da
Si lueged zämme de Schade ah
Er hät 13 Tonne Banane glade gha

13 Tonne! Und wüsseder was?
D'Hälfti liit verschtreut uf de Schtrass
Und de Wage schtaht schräg im Schtrassegrabe
Immer meh Chischte gheied obenabe

Werum wird da nüüt undernoh?
Aha, jetz isch de Pannedienscht cho
En Abschleppwage miteme Chrane
En Maa schtiigt us und isst e Banane


En Abschleppwage langet nie
Zum sone Ladig usem Grabe zieh
13 Tonne, das isch ja gschpune
Mir warted uf de grossi Chrane und mir ässed e Banane

Zwei Chauffeure und drüü Polizischte
Hocked uf de Bananechischte
Bis villicht inere Viertelstund
De Abschleppwage vo de Füürwehr chunt

En junge Puur mit sim Traktor
Dänkt: "Das chunnt mer komisch vor"
Drum isch er jetzt au uf e Chischte gsässe
Und hilft bim Banane ässe

Nei, das Traktörli langet nie
Zum sone Ladig usem Grabe zieh
13 Tonne, das isch ja gschpune
Mir warted uf de grossi Chrane und mir ässed e Banane oder zwei

E Schuelklass chunnt jetz usem Wald
Und macht bim Rank en Znünihalt
Immer meh Auto halted ah
Alli wänd Banane ha


Chli wiiter hine schtaht sogar
En italienische Reisecar
Und jetz fahrt endlich d'Füürwehr ane
Im Auto sitzed acht Füürwehrmanne

Es Füürwehrauto langet nie
Zum sone Ladig usem Grabe zieh
13 Tonne, das isch ja gschpune
Mir schtiiged uf de grossi Chrane und mir ässed e Banane oder zwei
Und jede nimmt no es Chischtli hei

Schliesslich sind nach knapp foif Stunde
13 Tonne Banane verschwunde
Und alli ziend mit vollem Mage
Mitenand de lääri Laschtwage

Usem Grabe zrugg uf d′Schtrass
De Chauffer hupet und git Gas
Und er isst di letscht Banane ganz ällei
Und fahrt hei